ເພື່ອເສີມຂະຫຍາຍສາຍພົວພັນມິດຕະພາບ ແລະ ຊຸກຍູ້ການຮ່ວມມືດ້ານການສຶກສາ, ການຄົ້ນຄວ້າວິທະຍາສາດ ແລະ ກິດຈະກຳວິຊາການ, ໃນຕອນບ່າຍວັນທີ 02/4/2026, ມະຫາວິທະຍາໄລເຕີຍບັກ ໄດ້ຈັດກອງປະຊຸມອອນລາຍກັບມະຫາວິທະຍາໄລສຸພານຸວົງ (ສາທາລະນະລັດ ປະຊາທິປະໄຕ ປະຊາຊົນລາວ). ກອງປະຊຸມໄດ້ສຸມໃສ່ປຶກສາຫາລື ແລະ ເປັນເອກະພາບເນື້ອໃນຂອງສັນຍາການຮ່ວມມື ໄລຍະ 2026–2030, ພ້ອມທັງກຳນົດທິດທາງການໃຫ້ການສະໜັບສະໜູນມະຫາວິທະຍາໄລເຕີຍບັກ ເປີດສາຂາຄູສອນພາສາລາວ – ໄທ ລະດັບປະລິນຍາຕີ ໃນປີ 2026.
ເຂົ້າຮ່ວມກອງປະຊຸມ, ຝ່າຍມະຫາວິທະຍາໄລສຸພານຸວົງ ມີ ທ່ານ ດຣ. Somchay Phaignavong, ຮອງອະທິການບໍດີ ພ້ອມດ້ວຍຕາງໜ້າການນຳຂອງຫ້ອງການວິຊາການ, ຫ້ອງການແຜນການ ແລະ ຄຸ້ມຄອງໂຄງການ, ການນຳ ແລະ ອາຈານຂອງຄະນະພາສາ. ຝ່າຍມະຫາວິທະຍາໄລເຕີຍບັກ ມີ ທ່ານ ດຣ. Nguyễn Văn Định, ອະທິການບໍດີ; ທ່ານ ດຣ. Đỗ Hồng Đức, ຮອງອະທິການບໍດີ ພ້ອມດ້ວຍຕາງໜ້າການນຳຂອງບັນດາພະແນກ: ວິທະຍາສາດ, ເຕັກໂນໂລຊີ ແລະ ການຮ່ວມມືສາກົນ; ວິຊາການ; ຮັບປະກັນຄຸນນະພາບ ແລະ ກວດກາ – ນິຕິກຳ; ວຽກງານການເມືອງ ແລະ ຄຸ້ມຄອງຜູ້ຮຽນ; ບັນຊີ – ການເງິນ; ຈັດຕັ້ງ – ບໍລິຫານ; ຕາງໜ້າຄະນະບໍລິຫານບັນດາຄະນະວິຊາ ແລະ ພະນັກງານ, ອາຈານທີ່ສົນໃຈ.
ພາບທີ 1: ຜູ້ແທນມະຫາວິທະຍາໄລເຕີຍບັກ ເຂົ້າຮ່ວມກອງປະຊຸມ
ກ່າວເປີດກອງປະຊຸມ, ທ່ານ ດຣ. Nguyễn Văn Định, ອະທິການບໍດີມະຫາວິທະຍາໄລເຕີຍບັກ ໄດ້ເນັ້ນເຖິງມູນເຊື້ອ 66 ປີ ແຫ່ງການກໍ່ຕັ້ງ ແລະ ຂະຫຍາຍຕົວ ແລະ 25 ປີ ຂອງການສ້າງລະດັບມະຫາວິທະຍາໄລ. ມະຫາວິທະຍາໄລມີຄວາມພາກພູມໃຈທີ່ມີປະສົບການອັນຍາວນານໃນການສ້າງນັກສຶກສາລາວ ມາແຕ່ຊຸມປີ 1980. ໃນ 10 ປີຜ່ານມາ, ມະຫາວິທະຍາໄລເຕີຍບັກ ໄດ້ສ້າງນັກສຶກສາລາວຫຼາຍກວ່າ 1.500 ຄົນ. ປັດຈຸບັນ, ມະຫາວິທະຍາໄລມີນັກສຶກສາຫຼາຍກວ່າ 5.000 ຄົນ, ໃນນັ້ນມີນັກສຶກສາລາວ 355 ຄົນ, ເຊິ່ງຢືນຢັນບົດບາດໃນການພັດທະນາຊັບພະຍາກອນມະນຸດໃຫ້ແກ່ ສປປ ລາວ ແລະ ຮັດແໜ້ນສາຍພົວພັນຮ່ວມມື ຫວຽດນາມ – ລາວ.
ພາບທີ 2: ອະທິການບໍດີມະຫາວິທະຍາໄລເຕີຍບັກ ກ່າວເປີດກອງປະຊຸມ
ບົນພື້ນຖານສາຍພົວພັນຮ່ວມມືລະຫວ່າງສອງມະຫາວິທະຍາໄລ ແລະ ສັນຍາການຮ່ວມມືທີ່ໄດ້ລົງນາມແຕ່ປີ 2019, ສອງຝ່າຍໄດ້ແລກປ່ຽນຢ່າງກົງໄປກົງມາ ແລະ ເປັນເອກະພາບໂດຍພື້ນຖານຕໍ່ເນື້ອໃນຫຼັກຂອງສັນຍາການຮ່ວມມືໃນໄລຍະໃໝ່. ມະຫາວິທະຍາໄລເຕີຍບັກ ແລະ ມະຫາວິທະຍາໄລສຸພານຸວົງ ເຫັນດີຟື້ນຟູ ແລະ ຊຸກຍູ້ການຮ່ວມມືໄລຍະ 2026–2030 ໃຫ້ມີເນື້ອໃນຕົວຈິງ, ມີປະສິດທິຜົນ ແລະ ທັງສອງຝ່າຍໄດ້ຮັບຜົນປະໂຫຍດ, ໂດຍສຸມໃສ່ຂົງເຂດຫຼັກຄື: ການຝຶກອົບຮົມ, ການພັດທະນາຊັບພະຍາກອນມະນຸດ (ແລກປ່ຽນອາຈານ, ນັກສຶກສາ), ການຄົ້ນຄວ້າວິທະຍາສາດ ແລະ ກິດຈະກຳວິຊາການອື່ນໆ.
ພາບທີ 3: ພາບລວມຂອງກອງປະຊຸມລະຫວ່າງສອງມະຫາວິທະຍາໄລ
ພິເສດ, ເນື້ອໃນໜຶ່ງທີ່ໄດ້ສຸມໃສ່ປຶກສາຫາລື ແລະ ໄດ້ຮັບຄຳໝັ້ນສັນຍາຮ່ວມມືຢ່າງຕັ້ງໜ້າຈາກມະຫາວິທະຍາໄລສຸພານຸວົງ ແມ່ນການສະໜັບສະໜູນມະຫາວິທະຍາໄລເຕີຍບັກ ເປີດສາຂາຄູສອນພາສາລາວ – ໄທ ລະດັບປະລິນຍາຕີ ໃນປີ 2026, ເພື່ອຕອບສະໜອງຄວາມຕ້ອງການດ້ານແຮງງານຂອງເຂດພາກຕາເວັນຕົກສ່ຽງເໜືອຂອງຫວຽດນາມ ແລະ ປະກອບສ່ວນເພີ່ມທະວີການແລກປ່ຽນດ້ານວັດທະນະທຳ, ການສຶກສາ ລະຫວ່າງສອງປະເທດ ຫວຽດນາມ – ລາວ. ບົນພື້ນຖານນັ້ນ, ສອງມະຫາວິທະຍາໄລຈະສືບຕໍ່ແລກປ່ຽນເພື່ອຫັນເປັນຮູບປະທຳວຽກງານຕ່າງໆ ເຊັ່ນ: ການສ້າງຫຼັກສູດ, ການສົ່ງອາຈານໄປສອນ ແລະ ການພັດທະນາເອກະສານການຮຽນ.
ເພື່ອຈັດຕັ້ງປະຕິບັດເນື້ອໃນທີ່ໄດ້ເປັນເອກະພາບກັນໃຫ້ມີປະສິດທິຜົນ, ມະຫາວິທະຍາໄລເຕີຍບັກ ໄດ້ສະເໜີໃຫ້ບັນດາຫ້ອງການປະສານງານຂອງສອງມະຫາວິທະຍາໄລ ສືບຕໍ່ປະສານສົມທົບຢ່າງໃກ້ຊິດ, ຮັກສາການແລກປ່ຽນຢ່າງເປັນປົກກະຕິ ເພື່ອໃຫ້ສັນຍາການຮ່ວມມືໄລຍະ 2026–2030 ສຳເລັດໂດຍໄວ ແລະ ກ້າວໄປສູ່ການລົງນາມຢ່າງເປັນທາງການ. ສອງຝ່າຍຍັງຈະສ້າງແຜນການຈັດຕັ້ງປະຕິບັດລະອຽດສຳລັບແຕ່ລະເນື້ອໃນການຮ່ວມມື ເພື່ອຮັບປະກັນຄວາມເປັນໄປໄດ້ໃນຕົວຈິງ.
ເນື່ອງໃນໂອກາດບຸນປີໃໝ່ລາວ, ຕາງໜ້າໃຫ້ຄະນະນຳມະຫາວິທະຍາໄລເຕີຍບັກ, ທ່ານ ດຣ. Nguyễn Văn Định ໄດ້ອວຍພອນປີໃໝ່ອັນດີງາມທີ່ສຸດ ໄປຍັງ ທ່ານ ດຣ. Somchay Phaignavong ພ້ອມດ້ວຍພະນັກງານ, ອາຈານຂອງມະຫາວິທະຍາໄລສຸພານຸວົງ, ພ້ອມທັງສະແດງຄວາມເຊື່ອໝັ້ນວ່າ ສາຍພົວພັນຮ່ວມມືລະຫວ່າງສອງມະຫາວິທະຍາໄລຈະນັບມື້ນັບພັດທະນາ ແລະ ນຳມາເຊິ່ງຜົນໄດ້ຮັບຕົວຈິງ.
ກອງປະຊຸມອອນລາຍໄດ້ສຳເລັດລົງດ້ວຍຜົນດີ, ເປີດໄລຍະການຮ່ວມມືໃໝ່ທີ່ມີຄວາມຫວັງລະຫວ່າງສອງມະຫາວິທະຍາໄລ. ຄວາມພະຍາຍາມ ແລະ ຄວາມຜູກພັນຂອງສອງຝ່າຍ ຈະປະກອບສ່ວນເສີມຂະຫຍາຍສາຍພົວພັນ “ມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ການຜູກພັນຍຸດທະສາດ” ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ – ລາວ.
ພາບບາງສ່ວນໃນກອງປະຊຸມ:
ພາບທີ 4: ພາບລວມຂອງກອງປະຊຸມ ທີ່ມະຫາວິທະຍາໄລເຕີຍບັກ
ພາບທີ 5: ທ່ານ ດຣ. Đặng Thị Hồng Liên, ຄະນະບໍດີຄະນະວິທະຍາສາດສັງຄົມ ກ່າວຄຳເຫັນໃນກອງປະຊຸມ
ພາບທີ 6: ຜູ້ແທນທີ່ເຂົ້າຮ່ວມກອງປະຊຸມຖ່າຍຮູບເປັນທີ່ລະນຶກ
